Macht eu die Fuessball-WM bis jetzt eigentlich Spass? Mir ehrlich gseit nöd eso. Bis jetzt isch es so gsi, dass ich e riese Vorfreud gha han und viel Spiili mitverfolgt han. Aber jetzt - keis Fuessballfieber. Ich verfolg die Spiili mit so wenig Emotione und Fanatismus wie scho lang nümme. Gahts nur mir so?
Liegts a mim Alter (28)?
Liegts dara, dass es eifach wichtigeri (privati) Sache git im Läbe?
Liegts dara, dass d'Wält i so enem schlächte Zuestand isch wie scho lang nümme? EU- und Euro-Krise, Erdbebe, Überschwämmige, Ölkatastrophene, Krieg, Terrorismus, sehr müehsami Schwiizer Politik, vieli Unsicherheite (nahe Oste, Korea, etc.). Villicht gsen ich eifach znegativ, aber es git siit öppe 2 Jahr viel Weltgeschehe, wo halt eifach wichtiger sind als Fuessball? Fuessball isch nur es Spiil und in es paar Mönet redet kei Sau meh devoo.
Liegts am exotische Ustragigsort? Spielziite sind für eus ja sehr guet zum aktiv mitverfolge, aber Stimmig? Schwiizer Fans vor Ort?
Liegts a de schlächte Schiedsrichter-Leischtige? Schiris us Saudi-Arabie, Usbekistan und anderne exotische Länder sind zum Teil eifach zu extrem pingelig.
Liegts a de zu viele Überraschige und dass es kein so grosse Unterschied meh git zwüschet de Natione? Frankriich und anderi grossi Fuessball-Natione sind d'usse. Viel europäischi Spieler sind nach zum Teil 80 Isätz (Liga, Cup, europäische Wettbewerb, x-Länderspiel) eifach zu kaputt, zum no gnueg Energie ha für die WM.
Liegts dara, dass die Spiiil eifach nur no es tüüfs Niveau und Unterhaltigswert händ? Zwänig offensive Fuessball? Diesbezüglich positiv ufgfalle sind bis jetzt eigentlich nur Brasilie, Portugal und Chile.
Liegts dara, dass es i de Schwiizer Nati zvill Veränderige geh hätt und kei würklichi Persönlichkeite meh ume sind? Alain Sutter, Adrian Knup, Kubilay Türkyilmaz, Chapuisat... so Spieler hämmer eigentlich nümme...
Gruess
Cybi