Kassensturz

Oh Mann, wie blöd muess mer si?

Mer chunnt es Schriibe über vo de schpanische Lotterie, wo schtaht, dass mer en Millionegwünn gmacht hät. Bevor mer de Gwünn uszahlt überchunnt, muess mer aber no d'Gwünnschtüür überwiise, isch ja klar.

Und nachher, wänn mer das gmacht hät, gaht mer no im Kasseschturz allne go zeige, wie dumm dass mer isch. Au für e 60-jährigi, find ich das ziemlich bescheuert und irgendwie chani kei Mitleid ha...

"Er hät so nett tönt am Telefon und hät sogar en Teil vo de Gwünnschtüre überno und für mich im vorus zahlt"...

Ha ha, de Hammer.

Nachdem sie dänn uf Schpanie isch, wo de Lotterie-Chef sie am Flughafe het sölle abhole und dete Schtunde lang gwartet hät, hät sie de Firmesitz wele sueche, de hät's nöd gäh und uf de Polizei oder so händ's ihre dänn verzellt, dass sie nöd de erscht seg, wo uf de superguet Trick ine gheit seg.

Dänn hät sie no de Rückflug verpasst und am Schluss seit sie:

"Han mim Maa no es SMS gschickt: Du hast wirklich Recht gehabt."

So Lüüt müend ja eigentlich dur Lotto zu Gäld cho...

Ich überleg mer's also au uf de Bruefzwiig um z'sattle. Bruchsch nur ein Tubel pro Monet und es gaht der rächt guet. Unglaublich... Vor allem au, dass die all de Chohle immer schön parat händ und sie niemer dra hinderet, das abz'hebe.